Archive

Posts Tagged ‘Facebook’

الفيس بوك والسياسة والإنتصار المزيف

December 24, 2012 1 comment

في وسط الصراع السياسي دلوقتي في بلدنا الفيس بوك بقى بالنسبة لكتير مننا شيء مهم جداً وواخد معظم وقتنا

 

أنا نفسي في الوضع ده .. وفكرت كتير في إني لازم أحط حد للوقت اللي بيضيع كتير عليه بس مأخدتش خطوة فعلية حتى الآن

 

المهم إني فكرت من كام يوم في السبب .. ولقيت إني وكتير من الناس واقعين في مشكلة بجد

 

مشكلة أكبر من مجرد وقت بيضيع وبس

 

لما حللت الموضوع لقيت إن الواحد مننا في وقت ما قبل كدة أخد فكرة عن فصيل سياسي معين إنهم مش كويسين وإقتنع بيها

 

وبناءاً على ده فهو مشترك في صفحات كتير بتهاجم الفصيل ده وعنده أصدقاء كتير بنفس الفكرة

 

كل مايدخل الفيس بوك ويشوف سقطة جديدة أو حاجة تدين الفصيل ده .. يتبسط .. وبسرعة يشارك بالحاجة دي

 

ده لأن الحاجة دي بتثبت إنه صح .. الفصيل ده وحش زي ماهو مقتنع وبيقول للناس .. بيشارك بالحاجة دي ولسان حاله بيقول – مش قلتلكم؟ وبيقول لنفسه – أنا صح

 

.. ووقتها بيحس بإنتصار .. إنتصار لأنه صح ولأن الباقي غلط .. لكنه من وجهة نظري إنتصار مزيف

 

ليه إنتصار مزيف؟

 

لأن كل اللي بتعمله ده من ورا شاشة .. وفاكر نفسك كدة صاحب موقف ورأي سياسي ومناضل من أجل الوطن .. وانت مابتشاركش في اي حاجة على أرض الواقع

 

عامل زي مشجع الكورة المتعصب اللي بيكره فريق معين بينافس فريقه .. وخسارة الفريق اللي بيكرهه بتبسطه جداً وتخليه مبسوط طول اليوم وغالباً بيقعد يغيظ في إصحابه وجيرانه اللي بيشجعوا الفريق ده ويحس وقتها بإنتصار مزيف

 

عارف إمتى يبقى مش مزيف؟ لو انت بتلعب مع الفريق اللي انت متعصبله وفرحت لما كسبت أو حتى فرحت لما الفريق المنافس خسر لأنك اتقدمت عليه في الترتيب أو حتى غلبته في ماتش

 

لو عايز تبقى منتصر بجد قدامك حاجة من إتنين

 

يا إما تبقى مشارك سياسياً بجد .. تنزل على أرض الواقع .. تنضم لحزب أو تفضل مستقل .. وتساهم في صنع التحول الديمقراطي لبلدك

 

أو .. لو مش هاتعرف تعمل ده لأي سبب

 

شوف انت بتعمل ايه .. بتشتغل في إيه؟ وفيد بلدك في مجال شغلك

 

إعمل عمل خيري ..

 

إعمل نشاط مفيد في بيتك .. في مدرستك .. في كليتك .. في مكان عملك .. مع جيرانك

 

شجع اللي حواليك على التغيير .. إبدأ بنفسك والقريبين منك .. بلدنا عايزانا إحنا نتغير عشان تتغير وتبقى أحسن

 

لو عملت كدة .. ساعتها بس .. هايبقى إنتصارك مش مزيف .. هايبقى إنتصار بجد

ومش هاتبقى لوحدك كسبان مهما كان انتمائك .. بلدنا كلها هاتبقى كسبانة

Advertisements
Categories: Life, Thoughts Tags: